काठमाडौँ। नेकपा (एमाले) को नयाँ नेतृत्व चयनका लागि भृकुटीमण्डपमा जारी निर्वाचन प्रक्रिया समापनतर्फ पुगेको छ। बुधबार बिहानबाट सुरु भएको मतदान बिहीबार बिहानसम्म आइपुग्दा अन्तिम चरणमा पुगेको हो।

निर्वाचन आयोगका अनुसार कुल २ हजार २ सय ६३ मतदातामध्ये बिहीबार बिहान ५ बजेसम्म २ हजार ९१ मत खसिसकेको छ। अब मात्र १७२ मतदाताले मतदान गर्न बाँकी रहेको निर्वाचन आयोगका उपाध्यक्ष सानुराज पोखरेलले जानकारी दिए।

मतदानको पछिल्लो अवस्था: बिहीबार बिहान ५:०० बजेसम्मको अपडेट

कुल मतदाता: २,२६३

खसेको मत: २,०९१

बाँकी मत: १७२

मतदान प्रक्रिया पूर्ण रूपमा सम्पन्न भएलगत्तै मतगणना सुरु हुनेछ। निर्वाचन आयोगका उपाध्यक्ष पोखरेलका अनुसार मतदान सकिएको तीन घण्टाभित्रै अन्तिम नतिजा सार्वजनिक गर्ने तयारी गरिएको छ।

आयोगले बिहीबार बिहान ५ बजेसम्म मतदानस्थल प्रवेश गरिसक्नुपर्ने समयसीमा तोकेको थियो। अहिले मतदानका लागि बाँकी रहेका मतदाताहरू लाइनमा बसिरहेका छन्। नेतृत्वका लागि भएको यस प्रतिस्पर्धाको नतिजालाई लिएर भृकुटीमण्डपमा उत्साह र प्रतीक्षाको वातावरण देखिएको छ।