हाम्रो बारेमा

भनिन्छ, सरल हुनु जति जटिल काम अर्को छैन । सरलतामा छलछाम छैन । बनावटी यसमा केही पाइन्न । सत्य नै सरलता हो । कृतिमता हटेपछि जे रहन्छ, त्यही हो सरलता । मानव दुनियाँ ज्यादा बनावटी र समाज ज्यादा देखावटी भएकाले सरलता यहाँ दुर्लभ भएको हो । त्यसैले सत्य बोल्न खोज्नेको जिब्रो काट्ने जमात जहिल्यै सक्रिय रहेको हुन्छ । तर पनि सरलताको महिमा कहिल्यै घट्ने छैन जसरी हराउने छैन फूलबाट सुवास । बच्चाको हाँसो किन लोभ्याउने खालको हुन्छ भने त्यसमा दोषी दृष्टि छैन । जो जति सरल हुन सक्यो, त्यो त्यती सत्य हुन्छ । जो जति सत्य छ, त्यो त्यति नै सरल देखिन्छ । गेटवे पब्लिकेशन प्रालिले सरल नाम रोजेर अनलाइन पत्रिका प्रकाशनको प्रारम्भ गर्नुको पृष्ठभूूमिमा यही सत्यको पुट छ । सरल हुनुको भारी चुनौति महसुस गरिकन यो नाम रोजिएको हो । यसै पनि बिनाचुनौतिको यात्रामा कुनै रस हुँदैन । रस नभएको काममा समय व्यतित गर्नु बुद्धिमानी ठानिँदैन । सरल पत्रिका यही मान्यतामा अडेको सत्यको यात्रा हो । समकालिन पत्रकारिताभन्दा यो भिन्नै कुनै चमत्कार त होईन तर यो व्यावसायिक सन्तुलन र आग्रहरहित भने हो । यसैमा छ सरलता, सत्य र सौन्दर्य । यतिबेला नेपालमा सञ्चार संस्थाहरुको संख्या उल्लेख्य छ । उद्योगकै हैसियतमा ती विकसित भैरहेका पनि छन् । भलै, अधिकांशतः अस्तित्व रक्षाको संघर्षमा छन् । केही भने एकाधिकार स्थापित हुने गरी बलियो हुँदै गएका छन् । दलीय प्रोत्साहन र प्रवध्र्दनमा चलेका संचार संस्था पनि असंख्य छन् । यसमा सरलता र सत्यको उपस्थिति खोजीरहनु नपर्ला ।

यो सबबाट जोगिुनमा नै पत्रकारिताको सरलता छ भन्ने हाम्रो बुझाइ छ । यो पत्रकारको मात्र पहलमा सुरु भएको डिजिटल पत्रिका हो । पत्रकारिताको आधारभूत मूल्य–मान्यता र कर्तव्यबाट विचलित नभई आग्रहरहित सन्तुलित समाचार प्रकाशन गर्ने हाम्रो अठोट छ । दिनप्रतिदिन सेल्फसेन्सरसीपबाट पत्रकारिता संक्रमित हुँदो छ । यही कारण पत्रकारिता लिखुरे हुँदै जाने र त्यसको आवरणमा व्यापार चाहिँ फस्टाउँदै जाने क्रम बढ्दो छ । अन्तत समाचारका महत्वपूर्ण बिषय जानाजान ओझेलमा पर्ने र आमनागरिक चैं सूचनाको पहुँचबाट बन्चित हुँदै जाने परिस्थिति समकालिन पत्रकारिताको तीतो यथार्थ हो । सरल पत्रिका पेशागत आचारसंहिताको अनुशासन पालना गर्नुबाहेक समाचारमा सेल्फसेन्सरसीप प्रति पूर्णरुपमा असहमत छ । हामी आममानिस र प्रकृतिका सबै सन्ततिप्रति समभाव राख्दै सूचना प्रवाह गर्ने अठोट गर्दछौं । पाठक बर्गको आलोचनात्मक टिप्पणी र सुझावलाई हामी सहर्ष स्वागत गर्दछौं । सकारात्मक पत्रकारिताको सरल अभ्यासबाट ओझेलमा परेका अनेक क्षेत्रलाई प्रकाशमा ल्याउने हाम्रो परम लक्ष्य हो । यसप्रति हामी प्रतिवध्द छौं । कुनै पनि किसिमको विभेद र कट्टरताको हामी विरोध गर्दछौं ।

विश्व मानचित्रमा रहेको नेपालको विशिष्ट पहिचान र यसभित्र रहेका अमूल्यनिधिहरुको संरक्षण र उपयुक्त प्रचार पत्रकारिताको एजेण्डा बन्नुपर्छ भन्ने हाम्रो मान्यता छ । सरल पत्रिका यिनै उद्देश्यबाट प्रारम्भ भएको हो । हामीलाई थाहा छ, एकै रातमा यी उद्देश्य पूरा गर्न सम्भव छैन । यसका लागि धैर्यपूर्ण लामो यात्राको आवश्यकता पर्छ । हामीले त्यही यात्रा प्रारम्भ गरेका हौं ।