काठमाडौं । नेपाल प्रिमियर लिग (एनपीएल) अन्तर्गत आज बुधबार विराटनगर किंग्स र चितवन राइनोज बीच प्रतिस्पर्धा हुँदैछ। विराटनगर किंग्सले लगातार तीन खेलमा जित हासिल गर्दै आफ्नो बलियो उपस्थितिको प्रमाण दिइसकेको छ । चितवन राइनोजले यस खेलमा विराटनगरको अपराजित यात्रालाई ब्रेक गर्ने रणनीति लिएको छ।

विराटनगर किंग्सले हालसम्मको सिजनमा उत्कृष्ट प्रदर्शन गरेको छ। यो टोली लगातार तीन खेल जितेर तालिकाको दोस्रो स्थानमा छ।

विराटनगरका हालसम्मका नतिजाहरू:

पहिलो खेल: पोखरा एभेन्जर्सविरुद्ध ५३ रनको फराकिलो जित।

दोस्रो खेल: काठमाण्डू गोर्खाजलाई ५ विकेटले पराजित।

तेस्रो खेल: साविक विजेता जनकपुर बोल्ट्सलाई ९ रनले पराजित।

चितवनको चुनौती (तालिकामा चौथो)

यता चितवन राइनोजको प्रदर्शन मिश्रित देखिएको छ। दुई खेलबाट एक जित र एक हारसहित चितवन दुई अंकका साथ तालिकाको चौथो स्थानमा छ।

पहिलो खेलमा कर्णाली याक्सलाई ४ विकेटले हराएको थियो। दोस्रो खेलमा लुम्बिनी लायन्ससँग ६ विकेटले पराजित भएको थियो।

आजको प्रतिस्पर्धामा विराटनगर आफ्नो अपराजित यात्रा कायम राख्न चाहन्छ भने चितवन लिगमा आफ्नो स्थिति सुधार गर्न जित निकाल्ने दबाबमा हुनेछ।