झापा । झापाको शिवसताक्षीमा सुरु भएको ‘एलभिडी झापा महिला गोल्डकप’ को पहिलो खेलमै विभागीय टोली नेपाल पुलिस क्लबले सानदार नतिजा निकालेको छ। सोमबार भएको उद्घाटन खेलमा पुलिसले अर्को डिभिजन क्लब चर्च ब्वाइज युनाइटेडलाई ८-० गोलको फराकिलो अन्तरले पराजित गर्दै प्रतियोगिताको सेमिफाइनलमा आफ्नो स्थान सुरक्षित गरेको छ।

पुलिसको यो विशाल जितमा दुई खेलाडीको प्रदर्शन निर्णायक रह्यो। मिना देउवाले एक्लै ५ गोल (५१, ६०, ६२, ६८ र ८१ औँ मिनेट) गर्दै ‘पेन्टा-गोल’को रेकर्ड बनाइन्। रेखा पौडेलले ह्याट्रिक (३७ औँ, ८० औँ र इन्ज्युरी समय) पूरा गरिन्। मिना र रेखाको तालमेल खेलभर उत्कृष्ट रह्यो। ३७ औँ मिनेटमा मिनाको क्रस पासमा रेखाले सुन्दर फिनिस गर्दै पुलिसका लागि पहिलो गोल गरेकी थिइन्।

खेलको पहिलो हाफमा दुवै टोलीले केही अवसर पाए पनि पुलिसले ३७ औँ मिनेटमा मात्र खाता खोल्न सक्यो। दोस्रो हाफको सुरुवाती समयदेखि नै पुलिसले चर्च ब्वाइजमाथि दबाब बढाउँदै गोलको वर्षा गरेको थियो। चर्च ब्वाइजको रक्षापङ्क्ति र गोलकिपरबीचको तालमेलमा कमजोरी आउँदा मिनाले त्यसको पूर्ण फाइदा उठाइन्। रेखाले ८० औँ मिनेटमा करिब ३० यार्ड लामो दूरीबाट शक्तिशाली सट प्रहार गर्दै गोल गरेकी थिइन्।

खेलमा उत्कृष्ट प्रदर्शन गर्ने पुलिस क्लबकी फरवार्ड मिना देउवा नगद १५ हजार रुपैयाँ सहित ‘प्लेयर अफ द म्याच’ घोषित भइन्। प्रतियोगिताअन्तर्गत  आज मंगलबार दोस्रो क्वार्टर फाइनल खेलमा विभागीय टोली एपीएफ फुटबल क्लब र भारत सिक्किमको सिंग्लिङ स्पोर्टिङ क्लब भिड्दैछन्।

कात्तिक २४ गते फाइनल हुने यस गोल्डकपको पुरस्कार राशि-

विजेता: नगद १० लाख १० हजार रुपैयाँ

उपविजेता: नगद पाँच लाख रुपैयाँ

सर्वोत्कृष्ट खेलाडी: नगद १ लाख ५० हजार रुपैयाँ

उत्कृष्ट विधाका खेलाडीहरू (गोलकिपर, प्रशिक्षक, उच्च गोलकर्ता लगायत) ले जनही २५ हजार रुपैयाँ पाउनेछन्। प्रतियोगितामा त्रिभुवन आर्मी एफसी, एपीएफ एफसी, नेपाल पुलिस क्लब, सङ्कटा एफसी, चर्च ब्वाइज युनाइटेड, झापा एफसी, आरएस पोखरा एफसी र सिंग्लिङ स्पोर्टिङ क्लब सिक्किम गरी कुल ८ टिमको सहभागिता छ।