झापा। तस्करी गरी भित्र्याइएको भारतीय नम्बर प्लेटको स्कर्पियो गाडीमा नेपाली नम्बर प्लेट प्रयोग गरेर चलाएको आरोपमा दुई जना पक्राउ परेका छन्।

प्रहरीले मोरङको पथरी शनिश्चरे नगरपालिका–८ का २१ वर्षीय ईश्वरी भण्डारी र भारतको नक्सालवारी पञ्चायत घर बताउने ३५ वर्षीय निताई घोसलाई झापाको काँकडभिट्टा बसपार्कबाट सोमबार राति पक्राउ गरेको हो।

नक्कली च्यासिस र नेपाली नम्बर प्लेट हालेर स्कर्पियो गाडी चलाएको उनीहरुमाथि आरोप छ। सशस्त्र प्रहरीको २ नम्बर गण झापा मातहत प्रस्तावित सीमा सुरक्षा गुल्म काँकाडभिट्टाबाट खटिएको टोलीले उनीहरुलाई पक्राउ गरेको हो।

नेपालबाट पुरानो गाडी भारतीतिर लगेर त्यहाँको नयाँ गाडीमा नेपाली च्यासिस र नम्बरप्लेट राखेर नेपाल भित्र्याउने गरेको पाइएपछि प्रहरीले निगरानी बढाएको थियो।