‘…(र) समय सत्ता’
समयसँग बेखबर बन्नु
या हुँइकिरहनु
दुबैमा उस्तै आनन्द छ
कुरा बोधमा छ !
समुन्द्र नबगेर मोहक छ
नदी कलकलाएर सुन्दर छ ।
किनारा नहुँदा
या समुन्द्र/नदी नहुँदामा पनि
सुन्दरता कहाँ रहला र ?
सबैको अस्तित्व
र, सबैको महत्व
समान कोरिएको छ यहाँ ।
विकास भने पनि
अविकास भने पनि
दुबै चोखा रहेनन् अब ।
सृष्टि विमोहित छ
धीरत्वसँग वीरत्व छैन
र, गतिसँग मति छैन ।
हराउनु या कराइ रहनु
जेमा आनन्द मिल्दछ
त्यसैमा रमाइ रहनु ।
भीरमा अल्झिएर
या झीरमा उनिएर होस्
यहाँ समय बाँचिरहन्छ ।
पूर्णत्वको हुटहुटी
या अभावको वर्तमान
दुबै उस्तै र एकैतिर बग्छन् ।
प्रतिक्रिया
Ramro bimba prayog.