विद्यालयको सहयोगका लागि चैत २५ गते विराटनगरमा ‘साइक्लोथन प्रतियोगिता’
सरल पत्रिका २० चैत २०७९ २१:३९
विराटनगर । चौथो संस्करणको ‘साइक्लोथन प्रतियोगिता’ चैत २५ गते शनिबार विराटनगरमा हुने भएको छ ।
रोटरी क्लब अफ विराटनगर फ्यूजनले प्रतियोगिताको आयोजना गर्न लागेको सोमबार पत्रकार सम्मेलन गरी जानकारी दिइएको हो ।
प्रतियोगितामा गियरजडित वा सामान्य सबै खाले साइकल प्रयोग गर्न सकिने जनाइएको छ ।
क्लब अध्यक्ष श्वेता तोदी, पूर्वअध्यक्ष जयश्री जाजु, युनेशराज श्रेष्ठ, सचिव शिल्पा अग्रवाल लगायतका पदाधिकारी सम्मिलिन पत्रकार सम्मेलनमा प्रतियोगिताबारे जानकारी दिइएको थियो ।
विराटनगरस्थित आदर्श बालिका माध्यमिक विद्यालयमा भौतिक निर्माणका लागि सहयोग जुटाउन प्रतियोगिता आयोजना गर्न लागिएको जनाइएको छ ।
उक्त विद्यालयको शौचालय व्यवस्थित पार्ने साथै रंगरोगन गर्ने उद्देश्य रहेको संस्थाले जनाएको छ ।
क्लबकी पूर्वअध्यक्ष महिला उद्यमी जयश्रीका अनुसार प्रतियोगितामा १६ वर्षभन्दा माथि उमेर समूहका ४०० भन्दा बढी पुरुष र महिलाले सहभागिता जनाउन पाउने जानकारी छन् ।
विराटनगर महानगरपालिका क्षेत्रको २० किलोमिटर दूरीमा प्रतियोगिता सञ्चालन हुनेछ ।
पुरुष र महिला दुवैतर्फ प्रथम हुनेलाई ३०/३० हजार पुरस्कार दिइनेछ । यस्तै, दोस्रो हुने दुवैतर्फ १५/१५ हजार र तेस्रो हुनेलाई १०/१० हजार रुपैयाँ पुरस्कार दिइने जनाइएको छ ।
प्रतियोगितामा सहभागी हुनेले दर्ता शुल्कवापत एक हजार रुपैयाँ तिर्नु पर्नेछ । संकलित रकमबाट पुरस्कार दिएर बाँकी रकम विद्यालयका लागि खर्च गरिने संस्थाले जनाएको छ ।
संस्थाले विभिन्न समयमा सामाजिक कार्यहरुमा सक्रियता देखाउँदै आएको छ ।
त्यसै सिलसिलामा यसपटक उक्त विद्यालयको स्तरोन्नतिका केही काम गर्ने उद्देश्यले प्रतियोगिता आयोजना गरिएको हो ।
