सरकार र यातायात व्यवसायीबीच २०६५ फागुन २० गते भएको सम्झौता अनुसार विद्यार्थीहरूले भाडामा ४५ प्रतिशत सहुलियत पाउने व्यवस्था छ।

तर पछिल्लो समय सार्वजनिक सवारी साधनहरूले विद्यार्थीलाई यो छुट नदिएको भन्दै ‘हेलो सरकार’ र विभागमा धेरै उजुरीहरू परेका थिए। धेरै संख्यामा गुनासो आएपछि विभागले व्यवसायीहरूलाई पुनः ताकेता गरेको हो।

विभागका निर्देशक गणेशमान सिं राईले नेपाल यातायात व्यवसायी राष्ट्रिय महासंघ, सार्वजनिक यातायात केन्द्रीय महासंघ र साझा यातायातलाई पत्र लेख्दै विद्यार्थी सहुलियतलाई प्रभावकारी बनाउन अनुरोध गरेका छन्।

सरकारले तोकेको यो नियम पालना नगर्ने सवारी साधनलाई कारबाही गरिने चेतावनी समेत विभागले दिएको छ।