काठमाडौँ । आगामी चैत ६ र ७ गते कोशी र लुम्बिनी प्रदेशका विभिन्न जिल्लामा तीव्र गतिको हावाहुरी चल्ने सम्भावना रहेको जल तथा मौसम विज्ञान विभागले बताएको छ।

हावाहुरीका कारण रुख ढल्ने, कमजोर संरचना उड्ने तथा विद्युत् र सञ्चार सेवा समेत प्रभावित हुन सक्ने देखिएकाले आवश्यक सतर्कता अपनाउन विभागले सर्वसाधारणमा अनुरोध गरेको छ।

विभागले सार्वजनिक गरेको पछिल्लो बुलेटिन अनुसार चैत ६ गते शुक्रबार लुम्बिनी प्रदेशका दाङ र नेपालगञ्ज लगायत तराईका जिल्लाहरूमा हावाहुरीको प्रभाव बढी रहने देखिएको छ।

यसैगरी चैत ७ गते शनिबार कोशी प्रदेशका विराटनगर, धनकुटा र धरान आसपासका क्षेत्रमा हावाहुरी चल्ने प्रक्षेपण गरिएको छ।

मौसमविद्का अनुसार हावाहुरीको वेग प्रतिसेकेण्ड ३३ मिटर अर्थात् करिब ११९ किलोमिटर प्रतिघण्टासम्म पुग्न सक्ने छ। यति तीव्र गतिको हावाले भौतिक संरचनामा क्षति पुर्‍याउन सक्ने जोखिम रहेकाले घर बाहिर निस्कँदा वा यात्रा गर्दा विशेष सावधानी अपनाउन विभागले सचेत गराएको छ।

विशेषगरी कच्ची घरका छाना उडाउन सक्ने र बिजुलीका पोलहरू ढल्न सक्ने भएकाले पूर्वतयारीमा रहन आग्रह गरिएको छ।