कर्णाली प्रदेशको राजधानी रहेको सुर्खेत जिल्लाभित्रै पर्ने चौकुने गाउँपालिकाका धेरै बस्तीहरू अझै पनि आधारभूत सेवासुविधाबाट वञ्चित रहेका छन्।

संघीय शासन व्यवस्था लागू भई तीन तहका सरकार गठन भएको वर्षौँ बितिसक्दा पनि यहाँका नागरिकले सडक, विद्युत् र स्वास्थ्य जस्ता अत्यावश्यक सेवा सहज रूपमा पाउन सकेका छैनन्।

स्थानीयका अनुसार गाउँपालिकाका धेरै बस्तीमा अझै मोटर गुड्ने सडक पुगेको छैन। सामान्य कामका लागि पनि घण्टौँ पैदल हिँड्नुपर्ने बाध्यता छ भने वर्षायाममा हिलो र पहिरोका कारण यात्रा थप जोखिमपूर्ण बन्ने गरेको छ। बिरामी पर्दा डोकोमा बोकेर अस्पताल पुर्‍याउनुपर्ने अवस्था रहेको स्थानीयले बताए।

विद्युत् सेवाको अवस्था पनि उस्तै छ। कतिपय स्थानमा पोल गाडिए पनि बिजुली नियमित नआउँदा बालबालिकाको पढाइ र साना व्यवसायमा प्रत्यक्ष असर परेको छ।

स्वास्थ्य क्षेत्रमा पर्याप्त औषधि र स्वास्थ्यकर्मीको अभाव छ। सामान्य उपचारका लागि पनि टाढा जानुपर्ने र आपतकालीन अवस्थामा समयमै अस्पताल पुग्न नसक्दा ज्यानकै जोखिम हुने गरेको गुनासो बढेको छ।

चुनावका बेला नेताहरूले विकासका ठूला आश्वासन दिए पनि व्यवहारमा ती वाचा पूरा नभएको स्थानीयको आरोप छ। राजधानी जिल्लामै यस्तो दयनीय अवस्था देखिनु चिन्ताजनक रहेको भन्दै उनीहरूले अन्य दुर्गम जिल्लाको अवस्था कस्तो होला भनी प्रश्न उठाएका छन्।

चौकुनेवासीले संघीय, प्रदेश र स्थानीय सरकारसँग सडक विस्तार, विद्युत् आपूर्ति र स्वास्थ्य संस्थाको स्तरोन्नतिलाई प्राथमिकतामा राख्न माग गरेका छन्।

विकासका ठूला योजना घोषणा भइरहँदा गाउँस्तरमा आधारभूत सेवा नपुग्नु सरकारका लागि चुनौती बनेको छ। यद्यपि, सरकारको ध्यान ढिलोचाँडो आफ्नो गाउँतर्फ पुग्ने र विकासको उज्यालो छाउने आशा स्थानीयमा अझै मरेको छैन।