मोरङ ६ मा शेखर कोइराला, अरु क्षेत्रमा को-को ?
सरल पत्रिका ६ माघ २०८२ १०:३३
काठमाडौँ। नेपाली कांग्रेसले आसन्न प्रतिनिधिसभा निर्वाचनका लागि मोरङका सबै ६ वटा निर्वाचन क्षेत्रमा आफ्ना उम्मेदवारहरूको टुङ्गो लगाएको छ। मंगलबार बिहान बसेको कांग्रेस संसदीय बोर्डको बैठकले जिल्लाका प्रभावशाली नेताहरूलाई चुनावी मैदानमा उतार्ने निर्णय गरेको हो।
पुराना र नयाँ अनुहारको सम्मिश्रण कांग्रेसले मोरङमा आफ्ना शीर्ष र प्रभावशाली नेताहरूलाई टिकट दिएको छ। मोरङ–६ बाट डा. शेखर कोइरालाले पुनः निर्वाचन लड्ने भएका छन् भने मोरङ–२ मा डा. मिनेन्द्र रिजाललाई उम्मेदवार बनाइएको छ। यस्तै, मोरङ–३ मा चर्चित नेता डा. सुनिल शर्मालाई नै दोहोर्याइएको छ।
महामन्त्री घिमिरे र अन्य उम्मेदवार मोरङ–४ मा नवनिर्वाचित महामन्त्री गुरुराज घिमिरेले प्रत्यक्षतर्फको टिकट पाएका छन्। यसैगरी, मोरङ–१ मा खड्ग फागो र मोरङ–५ मा फूलकुमार लावतीलाई उम्मेदवार बनाउने निर्णय कांग्रेसले गरेको छ।
मोरङका ६ वटै क्षेत्रमा प्रभावशाली नेताहरू मैदानमा उत्रिएसँगै यहाँको चुनावी प्रतिस्पर्धा निकै रोचक हुने देखिएको छ। धेरैजसो क्षेत्रमा पुराना अनुभवी र केहीमा नयाँ उत्साह बोकेका नेताहरूलाई मिलाएर कांग्रेसले चुनावी रणनीति तयार पारेको बुझिएको छ।
