काठमाडौँ। ईसाई धर्मका संस्थापक जिसस क्राइष्ट (येशू ख्रीष्ट) को जन्म जयन्तीको सम्झनामा आज बिहीबार क्रिसमस पर्व हर्षोल्लासका साथ मनाइँदैछ। हरेक वर्ष डिसेम्बर २५ तारिखका दिन मनाइने यो पर्वलाई प्रेम, शान्ति र सद्भावको उत्सवका रूपमा लिइन्छ।

धार्मिक विश्वास अनुसार दुई हजार वर्षअघि इजरायलको बेथलेहममा येशू ख्रीष्टको जन्म भएको थियो। उनलाई संसारमा शान्ति, प्रेम र मानवताको सन्देश फैलाउने मुक्तिदाताका रूपमा मानिन्छ।

ईसाई धर्मग्रन्थ अनुसार येशूले मानिसहरूलाई आपसी क्षमा, सेवा र सद्भावको मार्ग देखाएका थिए। त्यसैले उनको जन्मदिनलाई विशेष उत्सवको रूपमा मनाउन थालिएको हो।

क्रिसमसमा सजाइने ‘क्रिसमस ट्री’ (सधैँ हरियो रहने रुख) लाईजीवनको निरन्तरता र आशाको प्रतीक मानिन्छ भने सान्टा क्लजलाई खुसी र उपहार बाँड्ने दयालु पात्रको रूपमा लिइन्छ।

नेपालमा पनि पछिल्ला वर्षहरूमा क्रिसमस मनाइन थालेको छ। काठमाडौंको ठमेल, दरबारमार्ग, बौद्ध र ललितपुरका विभिन्न क्षेत्रमा क्रिसमसको विशेष सजावट गरिएको छ। पर्यटकीय नगरी पोखरा, चितवन, धरान, विराटनगर र लुम्बिनी लगायतका स्थानमा विदेशी पर्यटक र स्थानीयहरू मिलेर यो पर्व मनाइरहेका छन्। होटल र मलहरूमा सजाइएका क्रिसमस ट्री र झिलिमिली बत्तीले शहरको माहोल उत्सवमय बनाएको छ।

देशभरका चर्चहरूमा बिहानैदेखि विशेष प्रार्थना र भजन आयोजना गरिएका छन्। यस अवसरमा ईसाई धर्मालम्बीहरूले चर्चमा भेला भई देशमा शान्ति र सुव्यवस्थाको कामना गर्दै सामूहिक प्रार्थना गर्छन्।

नेपाल सरकारले क्रिसमसको उपलक्ष्यमा आज देशभर सार्वजनिक बिदासमेत दिएको छ। समाजका विभिन्न वर्ग र समुदायका मानिसहरूले पनि सामाजिक सञ्जालमार्फत एकअर्कालाई क्रिसमसको शुभकामना साटासाट गरिरहेका छन्।