काठमाडौँ । नेकपा (एमाले) को दशौँ राष्ट्रिय महाधिवेशनमा नेतृत्व चयनको प्रक्रिया अघि बढिरहँदा आफूहरूले आकांक्षा राखेको पदाधिकारीमा स्थान नपाएपछि अध्यक्ष केपी शर्मा ओलीका निकट मानिने चार प्रमुख नेताहरूले साथ छाडेका छन्। यस समूह परित्यागसँगै महाधिवेशनमा ओली र अर्का प्रत्यासी ईश्वर पोखरेलबीचको भिडन्तलाई थप रोचक बनाएको छ।

निवर्तमान ओली सरकारमा शिक्षामन्त्री रहेका रघुजी पन्त, प्रचार विभाग प्रमुख राजेन्द्र गौतम, नेता कृष्णगोपाल श्रेष्ठ र गोकुल बास्कोटाले ओलीको समूहलाई चुनौती दिँदै अन्य पदमा उम्मेदवारी दिएका छन्। ओली समूहबाट उपाध्यक्ष पदमा मनोनयन नभएपछि रघुजी पन्तले ईश्वर पोखरेलको प्यानलबाट उपाध्यक्ष पदमा उम्मेदवारी दर्ता गराएका छन्। त्यसैगरी, ओली समूहबाट सचिवमा लड्ने अपेक्षा गरेका प्रचार विभाग प्रमुख राजेन्द्र गौतमले भने स्वतन्त्र उम्मेदवारका रूपमा उपमहासचिव पदमा उम्मेदवारी दर्ता  गराएका छन्।

लामो समय अध्यक्ष ओलीका विश्वासपात्र रहेका कृष्णगोपाल श्रेष्ठले आफूलाई ‘अपमान र अन्याय’ भएको भन्दै पोखरेल समूहबाट सचिव पदमा उम्मेदवारी दिएका छन्। यसैगरी, विगतमा ओलीका निकट सहयोगी मानिने गोकुल बास्कोटाले पनि पोखरेल समूहबाट सचिव पदमा उम्मेदवारी दिएका छन्। बास्कोटाले ओली समूह यसअघि नै छाडेका थिए।

ओली समूहमा महासचिवमा दाबेदारी पेस गरेका नेता प्रदीप ज्ञवालीले भने उपाध्यक्षमा मनोनयन दर्ता नगरी घरतिर हिँड्नुभएको एमाले नेताहरूले बताएका छन्। उहाँको यस कदमलाई अर्थपूर्ण रूपमा हेरिएको छ। महाधिवेशनको निर्वाचन प्रक्रियामा अध्यक्ष पदमा केपी शर्मा ओली र ईश्वर पोखरेलबीच सीधा भिडन्त हुने पक्का भइसकेको छ। समूह परिवर्तन र असन्तुष्टिको यो शृङ्खलाले एमालेको आगामी नेतृत्व चयन थप प्रतिस्पर्धात्मक बन्ने देखिएको छ।