सुदूरपश्चिम एनपीएल फाइनलमा : विराटनगरमाथि एकपक्षीय जित
सरल पत्रिका २३ मंसिर २०८२ १६:१९
काठमाडौं । सुदूरपश्चिम विराटनगर किंग्समाथि एकपक्षीय जित हात पार्दै लगातार दोस्रो पटक नेपाल प्रिमियर लिग (एनपीएल) को फाइनलमा प्रवेश गरेको छ।
कीर्तिपुरस्थित टीयू अन्तर्राष्ट्रिय क्रिकेट मैदानमा भएको पहिलो क्वालिफायरमा टस हारेर पहिले ब्याटिङ गरेको सुदूरपश्चिमले ओपनर विनोद भण्डारीको शानदार ६३ रनको सहयोगमा निर्धारित २० ओभरमा १५५ रनको चुनौतीपूर्ण योगफल तयार पारेको थियो।
१५६ रनको लक्ष्य पछ्याउन ओर्लेको विराटनगर किंग्स सुदूरपश्चिमको धारिलो बलिङ आक्रमण र उत्कृष्ट फिल्डिङ सामु पूर्ण रूपमा निरिह बन्यो। विराटनगर १४.१ ओभरमा मात्र ७८ रनमा अलआउट हुँदा सुदूरपश्चिमले विशाल ७७ रनको जित दर्ता गर्यो।
विराटनगरका लागि फाफ डु प्लेसीले सर्वाधिक ३६ रन बनाए पनि बाँकी ब्याट्सम्यानहरूले दोहोरो अंक जोड्न सकेनन्। सुदूरपश्चिमका लागि स्कट कुगेलेइन, हर्मीत सिंह र अविनाश बोहराले २-२ विकेट लिए।
यस जितसँगै सुदूरपश्चिमले लिग चरणको अन्तिम खेलमा भोगेको हारको बदलासमेत लिएको छ र अब शनिवार उपाधिका लागि दोस्रो क्वालिफायरको विजेतासँग भिड्नेछ।
पराजित विराटनगरले भने फाइनल पुग्नका लागि अर्को अवसर पाउनेछ। उसले बिहीबार हुने दोस्रो क्वालिफायरमा बुधबारको एलिमिनेटर (काठमान्डु गोर्खाज र लुम्बिनी लायन्सबीचको खेल) को विजेतासँग प्रतिस्पर्धा गर्नेछ।
