विराटनगर । कुकुर झुन्ड्याएर मारेको आरोपमा खोटाङमा एक जना व्यक्तिलाई प्रहरीले नियन्त्रणमा लिएको छ। पक्राउ पर्नेमा हलेसी तुवाचुङ नगरपालिका–२ का ४४ वर्षीय बाबुराम मगर रहेका छन्।

स्थानीय जसकुमार राईको कुकुरले सोही ठाउँका दलबहादुर राईलाई टोकेको थियो। यस घटनापछि मगरले आफ्नो कुकुरले पनि मानिसलाई टोक्न सक्ने आशंका गरेर गत शुक्रबार झुन्ड्याएर मारेको प्रहरीलाई बयान दिएका छन्।

जिल्ला प्रहरी कार्यालय खोटाङका सूचना अधिकारी प्रहरी निरीक्षक राजु विष्टका अनुसार मगरलाई शनिबार दिउँसो नियन्त्रणमा लिइएको हो।

प्रहरी निरीक्षक विष्टले दिएको जानकारीअनुसार मगरलाई आइतबार जिल्ला प्रहरी कार्यालयमा ल्याएर पशुपन्छीसम्बन्धी कसुरमा मुद्दा दर्ता गरी म्याद थपको तयारी भइरहेको छ।

कुकुर मार्दा लाग्ने कानुनी प्रावधान

नेपालको कानुनले पशुपन्छीलाई क्रूरतापूर्वक मार्ने वा अमानवीय व्यवहार गर्नेलाई दण्डनीय मानेको छ। मगरलाई पक्राउ गरी मुद्दा चलाइएको “पशुपन्छीसम्बन्धी कसुर” देहायबमोजिमको कानुनी व्यवस्था अन्तर्गत पर्दछ।

यस्तो कसुर मुलुकी अपराध संहिता, २०७४ को परिच्छेद २७ (पशुपन्छीसम्बन्धी कसूर) अन्तर्गत पर्दछ। विशेषगरी, दफा २८९ (पशुपन्छीमाथि निर्दयी वा क्रूर व्यवहार गर्न नहुने) र दफा २९० (पशुपन्छीको अङ्गभङ्ग वा नाश गर्न नहुने) को व्यवस्था लागू हुन्छ।

१. दफा २८९: पशुपन्छीमाथि निर्दयी वा क्रूर व्यवहार गर्न नहुने

कसैले कुनै पशुपन्छीलाई निम्न कार्यहरू गर्न हुँदैन: आवश्यक खाना वा पानी नदिने। घाइते वा बिरामी पशुपन्छीलाई उपचार नगरी बेवास्ता गर्ने। अत्याधिक काम लगाउने वा बोक्न नसक्ने भारी बोकाउने। कुनै पनि प्रकारको निर्दयी वा अमानवीय व्यवहार गर्ने।

२. दफा २९०: पशुपन्छीको अङ्गभङ्ग वा नाश गर्न नहुने

कसैले पनि कुनै पशुपन्छीको अङ्गभङ्ग वा नाश गर्नु हुँदैन, जुन यस घटनामा लागू हुन्छ।

३. सजायको व्यवस्था (दफा २९० को उपदफा २ अनुसार)

यदि कसैले कुनै पशुपन्छीको अङ्गभङ्ग वा नाश गर्छ भने उसलाई निम्न अनुसारको सजाय हुने व्यवस्था छ:

तीन महिनासम्म कैद वा पाँच हजार रुपैयाँसम्म जरिवाना वा दुवै सजाय हुन सक्नेछ। यदि सो पशुपन्छीको क्षतिपूर्ति भराउनुपर्ने भएमा सोको फैसला पनि अदालतले गर्न सक्नेछ।