विराटनगर। धरान उपमहानगरपालिकाका मेयर हर्कराज राई साम्पाङ अध्यक्ष रहेको राजनीतिक दल श्रम संस्कृति पार्टीले मंगलबार धरानमा पत्रकार सम्मेलन आयोजना गर्दै पार्टीको मूल राजनीतिक दर्शन ‘हर्कवाद’ रहेको घोषणा गरेको छ।

पार्टीको अवधारणा र एजेन्डाहरू सार्वजनिक गर्दै अध्यक्ष साम्पाङले आफ्नो मूल सिद्धान्तलाई प्रस्ट्याएका छन्।

अध्यक्ष साम्पाङले अवधारणा पत्र पढेर सुनाउँदै हर्कवाद लाई यसरी परिभाषित गरे:

“प्रकृति–संस्कृति–प्रविधिको सन्तुलित र समुचित विकासले मात्रै मानव संसार र जगतको रक्षा र उन्नति गर्न सक्दछ र त्यो अवस्था प्राप्त गर्न अनिवार्य श्रम र श्रमदान गर्नुपर्दछ। अनिवार्य श्रम र श्रमदाताको नीति र निरन्तर अभ्यासले मात्रै अभाव, गरिबी, विभेद र त्यसबाट उत्पन्न द्वन्द्व, लडाइँ, विनास र अशान्तिको अन्त्य गर्न सकिन्छ भन्ने नै हर्कवाद को मूल राजनीतिक दर्शन हो।”

साम्पाङले यो देशको ढुङ्गा र माटोमा श्रम रोपेर देशको स्वाधीनता, सम्प्रभुता, समृद्धि, सुख र खुसीसहितको सुनौलो भविष्य फलाउने सूत्र पनि ‘हर्कवाद’ नै भएको बताए।

मुख्य अवधारणा र शासकीय स्वरूप सम्बन्धी योजनाहरू:

शासकीय स्वरूप: पार्टीको अवधारणाअनुसार, बालिग मताधिकारद्वारा प्रत्यक्ष चुनिने कार्यकारी राष्ट्रपति रहनेछन्। राष्ट्रपति राष्ट्र र सरकार दुवैको प्रमुख हुने र उनको पदावधि पाँच वर्षको हुनेछ।

सरकार गठन: राष्ट्रपतिले राजनीतिक क्षेत्र बाहिरका विषय विज्ञ वा सांसद जसलाई पनि लिएर आफ्नो पायकको सरकार गठन गर्न पाउनेछन्। केन्द्रमा समानुपातिक समावेशी किसिमको सरकार बनाउने नीति रहेको छ।

प्रदेश सरकार: प्रदेशका मुख्यमन्त्रीसमेत स्थानीय सरकार चुनिए जस्तै प्रत्यक्ष निर्वाचित हुने अवधारणा पार्टीले अघि सारेको छ।

प्रतिनिधित्व र निर्वाचन प्रणाली: राज्यको सबै अङ्गहरूमा आदिवासी, जनजाति, खसआर्य, मधेसी, दलित, मुस्लिम र अल्पसङ्ख्यक समुदायको अधिकार सुनिश्चित गर्न पूर्ण समानुपातिक निर्वाचन प्रणाली अङ्गीकार गर्ने नीति छ।

राष्ट्रपति/उपराष्ट्रपति चयन: दलले उम्मेदवारी दिँदा राष्ट्रपति र उपराष्ट्रपति एकै लिङ्ग र एकै जाति समुदायको नरहने गरी व्यवस्था मिलाउने जनाइएको छ।

विकास नीति: पहुँच र शक्तिको आडमा गरिने असमान र अन्यायपूर्ण विकासको वितरण अन्त्य गरिने र काठमाडौँ केन्द्रित वा शहर केन्द्रित विकासलाई गाउँ घर केन्द्रित बनाइने।

अर्थनीति: वैज्ञानिक कर लागू गर्ने र धनीबाट धेरै लिएर गरिबलाई बचाउने नीति लिइनेछ।

धर्मनिरपेक्षता: राज्यको कुनै धर्म नहुने तर व्यक्तिको धार्मिक आस्थाप्रति स्वतन्त्रता रहने उल्लेख छ। कसैलाई करकाप वा बाध्य पारेर धर्म परिवर्तन गराउन नहुने, अन्यथा दण्डनीय मानिने घोषणापत्रमा जनाइएको छ।

शिक्षा नीति: जेनजी पुस्तालाई उत्पादन, निर्माण र आविष्कारमा लगाउने र जीवनोपयोगी शिक्षा पद्दति लागू गरी हप्तामा ३ दिन मात्र पढाउने व्यवस्था मिलाएर पाठ्यभार घटाउने नीति लिइनेछ।

पार्टीले आफ्नो अवधारणापत्रमा सार्वभौम र राजकीय सत्ता, भौगोलिक अखण्डता, असंलग्न परराष्ट्र नीति, नागरिक सरकार, न्यायपालिका, बहुभाषिक नीति, आत्मनिर्णय, स्वशासन र स्वायत्तता लगायतका बुँदाहरूलाई पनि प्रमुख एजेन्डा बनाएको छ।