इलाम। शिक्षा जीवनको एउटा यस्तो यात्रा हो, जहाँ गुरु र चेलाको सम्बन्ध सधैं विशेष रहन्छ। इलामको रोङ गाउँपालिका–५ स्थित उमा महेश्वर माध्यमिक विद्यालयमा यस्तै एउटा अविस्मरणीय क्षण देखियो।

३५ वर्षसम्म अनवरत रूपमा शिक्षण सेवामा समर्पित चन्द्रमान लाप्चाले अनिवार्य अवकाश पाएपछि उनलाई भव्य र भावुक बिदाइ गरियो।

‘चन्द्रमान सर’ ले आफ्नो जीवनको महत्वपूर्ण समय आफ्नै गाउँका हजारौं विद्यार्थीको भविष्य निर्माणमा खर्चेका थिए। उनले पढाएका कतिपय विद्यार्थीहरू आज देश–विदेशका विभिन्न क्षेत्रमा सफल छन्। यसै विद्यालयमा पनि उनकै केही विद्यार्थीहरू सहकर्मी बनेर सँगै पढाइरहेका थिए।

यही बिदाइ कार्यक्रमको सबैभन्दा भावुक क्षण तब आयो, जब उनकै पूर्व विद्यार्थी तथा हालकी सहकर्मी सन्ध्या लाप्चाले आफूले बनाएको चन्द्रमान सरको सुन्दर स्केच तस्बिर उपहार दिइन्। आफ्नो गुरुको तस्बिर आफैं बनाएर बिदाइ गर्नुको यो दृश्यले सबैको मन छोयो।

यस क्षणले कार्यक्रममा उपस्थित सबैलाई भावुक बनायो। स्थानीय बासिन्दा जनक न्यौपाने भन्छन्, ‘शिक्षा भनेको केवल किताबी ज्ञान दिनु मात्र होइन, यो त जीवनभर हृदयमा बस्ने अमूल्य सम्बन्ध र संस्कार पनि हो भन्ने कुरा यस कार्यक्रमले प्रमाणित गर्यो।’

यसरी एक शिक्षकको सेवाको सम्मान मात्र नभई, गुरु–शिष्यको अटूट प्रेम र सम्बन्धको एक अनुपम उदाहरण पनि यो बिदाइ कार्यक्रमले प्रस्तुत गर्यो। चन्द्रमान लाप्चाको ३५ वर्ष लामो शिक्षण यात्राले हजारौं विद्यार्थीको जीवनमा जुन ज्योति बालेको छ, त्यसको सम्मानमा विद्यालय परिवार, विद्यार्थी र गाउँले मिलेर दिएको यो बिदाइ साँच्चै नै प्रेरणादायक थियो।