क्षितिजको एक धर्काे किरण
बैँसचित्रमा पोखिएपछि
पोतिन्छन् वयका रङ्गहरू
लजाउँदै निहुरिन्छन् आँखाहरू
र, मिसिन्छन् नजरहरू आपसमा
बतासको मन्द स्पर्श र सङ्गीतसँगै
चियाबारीको एकान्तमा
तिमी, म र साँझको भेट हुँदा।

***

मैले तिम्रो छाया सुमसुम्याउँदा
तिम्रा आँखाहरूमा जून नाचिरहेका हुन्छन्
सगरमा घामले छाडी गएको
लालित्यका लप्काहरू सुस्तरी सुस्तरी
जूनको अँगालोमा बेरिन्छन्
अनि तिम्रो जूनसँग मेरा आँखाहरू
आकासभरि दौडिन थाल्छन्
बादलको अङ्गालो मारेर
तिमी, म र साँझको भेट हुँदा।

***

प्रेम रापिलो हुँदो रहेछ र शीतल पनि
भावना, अनुभूति र भोगाइमा
कहिले उचाइमा
कहिले गहिराइमा
कहिले फैलावटमा
उकाली र ओरालीहरूमा पनि
चारैतिर पर…परसम्म
जहाँ प्रेमका कथाहरू लेखिँदा रहेछन्
घाम–जूनका किरणहरूमा
गोधुलीका रङहरूमा
र, साँझमा गुँड फर्किदै गरेका
चराहरूको वेगमा
तिमी, म र साँझको भेट हुँदा।

***

साँझले जुटाउँदो रहेछ
साँझले छुटाउँदो पनि रहेछ
घाम–जून जस्तै
हाम्रो माया जस्तै
अनन्त आकासलाई साक्षी राखेर
म नियाल्दैछु त्यही एउटा साँझ
जहाँ म फलैँचामा अडेसिएर
नापिरहेको हुन्छु हाम्रो प्रेमको गहिराइ
र, लेखिरहेको हुन्छु मिलनको गीत
तिमी, म र साँझको भेट हुँदा।