काठमाडौं। नेपालमा सरदर मितिभन्दा १५ दिन अघि जेठ १५ गते मनसुन कोशी प्रदेश भित्रिएको थियो। केही दिन सक्रिय भएर मनसुन कोशी प्रदेशबाटै पूर्वी एसिया फर्किएको छ।

पूर्वी एसिया क्षेत्रमा बलियो न्यूनचापीय क्षेत्र बनेकाले मनसुनी वायु नेपालको कोशीबाट उता सोहोरिएको मौसमविद् बताउँछन्।

जल तथा मौसम विज्ञान विभाग, मौसम पूर्वानुमान महाशाखाका मौसमविद् गोविन्द झाले भने, ‘मनसुन पूर्वी एसिया क्षेत्र मुख्यगरी फिलिपिन्सतिर सोहोरिएर गएकाले कोशीबाट अन्यत्र फैलिन पाएन, अझै केही दिन मनसुन फैलिने सम्भावना देखिँदैन।’

मनसुन भित्रिएलगत्तै जेठ १७ गते पूर्वी नेपालमा ठूलो वर्षा र बाढी आयो। धरान–धनकुटा सडकखण्डको साँगुरीगढी गाउँपालिका–६ स्थित फेदीको १०० मिटर सडक लेउती खोलाको बाढीले बगायो। झापामा माइखोलाको बाढीले २२ घर डुबान भयो। त्यसपछि खासै वर्षा भएको छैन।

पश्चिम तथा मध्यक्षेत्रमा भने स्थानीय र पश्चिमी वायु सक्रिय भएको छ। मौसमविद् झा पश्चिमी वायु अझै बलियो रहेकाले मनसुन आउन नपाएको बताउँछन्।

नेपालमा बङ्गालको खाडीको जलवाष्प बोकेर मनसुनी वायु आउने गर्छ। तर त्यो कमजोर भएको उनले बताए। जसका कारण हाल देशभर तापक्रम वृद्धि भइरहेको छ।

मौसमविद्का अनुसार यसरी मनसुन ‘ब्रेक’ हुनु राम्रो सङ्केत होइन। यसले कतै धेरै वर्षा गराउने र कतै खडेरी पार्ने हुनसक्छ।

मौसमविद् झाले भोलि बुधबारदेखि नेपालका कतिपय क्षेत्रमा फेरि बदली सुरु हुने बताए। उनका अनुसार अहिले बङ्गालको खाडीमा फेरि अर्को न्यून चापीय प्रणाली बनेको छ।

भारतको मध्यभूभागमा पनि न्यून चापीय क्षेत्र बन्दै गएको उनले बताए। जसको असर नेपालमा आइपुग्ने छ र वर्षा गराउने छ। यसवर्ष जल तथा मौसम विज्ञान विभागले धेरै वर्षा हुने र गर्मी पनि बढी हुने आकलन सार्वजनिक गरिसकेको छ।

त्यसअनुसार राष्ट्रिय विपद् जोखिम न्यूनिकरण तथा व्यवस्थापन प्राधिकरणले विपद प्रतिकार्य योजना लागू गरिसकेको छ।

प्राधिकरणका प्रवक्ता रामबहादु केसीले करिब २० लाख मानिस प्रभावित हुने र त्यसको १० प्रतिशतलाई राहत तथा उद्धार गर्नुपर्ने अवस्था आउन सक्ने अनुमानसहित तयारी गरिरहेको बताए। (रासस)