काठमाडौं। चीनले नेपाली विद्यार्थीलाई प्रत्येक तीन वर्षमा छात्रवृत्ति दिने भएको छ। चीनको सिचवान प्रान्तीय सरकारले ६० जना नेपाली विद्यार्थीलाई छात्रवृत्ति दिने भएको हो।

चीन भ्रमणमा रहेको कांग्रेस प्रतिनिधिमण्डल र सिचवान प्रान्तीय सरकारका मन्त्री र नेताहरूको छलफलपछि सिचवान सरकारले छात्रवृत्ति दिने घोषणा गरेको हो। छलफलमा कांग्रेस नेतृ सुजाता कोइरालाले नेपाली विद्यार्थीका लागि छात्रवृत्ति तथा चीनबाट लुम्बिनी र लुम्बिनीबाट पोखरा सिधा उडान सुरु गर्न आग्रह गरेकी थिइन्।

उनले आफूले राखेको एउटा प्रस्ताव तुरुन्त सम्बोधन भएको र अर्काे प्रस्ताव पनि चाँडै सम्बोधन हुने विश्वास समेत व्यक्त गरेकी छन्।

चिनियाँ कूटनीतिज्ञ सर्लाले कोइरालाको भ्रमणलाई आफूहरूले महत्वपूर्ण रूपमा लिएको र छात्रवृत्तिको विषय भ्रमणको महत्वपूर्ण उपलब्धि भएको बताइन्। चिनियाँ कम्युनिस्ट पार्टीले नेपालका सबै राजनीतिक दलहरूसँग समानस्तरको सम्बन्ध राख्न चाहेको धारणा समेत उनले राखिन्।