विराटनगर। विराटनगरको नोबेल शिक्षण अस्पतालले क्यान्सरको उपचारमा प्रयोग हुने अत्याधुनिक उपकरण ल्याएको छ। नेपालमै पहिलोपटक यस्तो मेसिन ल्याइएको अस्पतालले दाबी गरेको छ।

करिब १ अर्ब लागतमा भेरियन्ट कम्पनीको ‘एज’ मोडलको उपकरण ल्याएको हो। अस्पताल प्रशासनका अनुसार यस्तो उपकरण एसियामा जम्मा ९ वटा छन्।

नेपालमा पहिलोपटक नोबेलले अत्याधुनिक उपकरण ल्याएको अस्पतालका सञ्चालक एवं मोरङ क्षेत्र नम्बर ३ का संघीय सांसद सुनील शर्माले जानकारी दिए।

नेपालमा ‘टुबिन’ र ‘एलसिन’ भन्ने अरु उपकरण प्रचलित रहे पनि ‘एज’ अत्याधुनिक उपकरण भएको शर्माको भनाइ छ।

उक्त उपकरणले १ दिनमा ८० जना बिरामीको उपचार गर्न सक्ने जनाइएको छ। नयाँ मेसिन ल्याइएसँगै ३ अर्ब ४० करोड लागतमा क्यान्सर विभागको संरचना तयार गरिएको शर्माले बताए।

उनले उपकरणको सहायताबाट ‘६ डी काउच’, ‘हाइपर आर्क’, ‘एचडी एम आईसी’, ‘एसआर एस’ र ‘एसबी आरटी’ले शल्यक्रिया बिना नै क्यान्सर सेललाई निर्मूल गर्नसक्ने बताए।

बिना दुखाइ उपकरणको सहायताले शरीरभित्र पुगेर क्यान्सर सेललाई नष्ट गर्ने जानकारी शर्माले दिए।