काठमाडौं। एन्फा महिला लिग फुटबलको दोस्रो चरणको खेलमा त्रिभुवन आर्मी क्लबले नेपाल पुलिस क्लबलाई पराजित गरेको छ। एन्फा कम्प्लेक्सको मैदान सातदोबाटोमा आज बिहीबार भएको खेलमा आर्मीले पुलिसलाई १-० गोलले पराजित गरेको हो।

आजको खेलमा पुलिस क्लबकी समीक्षा घिमिरेले गरेको आत्मघाती गोल नै निर्णायक बन्यो ।  जीतसँगै आर्मी ६ खेलमा १३ अङ्कसहित तालिकाको दोस्रो स्थानमा पुगेको छ भने पुलिस ६ खेलमा १० अङ्कसहित तेस्रो स्थानमा छ।

प्रतियोगितामा आर्मी, पुलिससहित सशस्त्र प्रहरी बलको एपीएफ क्लब, बाग्मती युथ क्लब र स्याङ्जाको वालिङ नगरपालिका छन्। लिगको पहिलो चरणपछि ५ वटा टोली दोस्रो चरणको सुपर फाइभमा पुगेका हुन्।

अखिल नेपाल फुटबल सङ्घ (एन्फा) को आयोजनामा भइरहेको एन्फा महिला लिग माघ १६ गतेसम्म चल्नेछ ।