विराटनगर। कोशीमा वन कार्यालय अन्तर्गत वन रक्षक पदमा दरखास्त आह्वान गरिएको छ। प्रदेश निजामती सेवा अन्तर्गत प्राविधिक तर्फका प्रदेश वन सेवा, जनरल फरेष्ट्री समूह, सहायक स्तर तेस्रो तह, वन रक्षक पदको खुला तथा समावेशी प्रतियोगितात्मक परीक्षाको विज्ञापन प्रकाशित गरिएको हो।

प्रदेश निजामती सेवा तर्फका निम्न सेवा, समूह, उपसमूह तथा तहका पदहरूमा (खुला तथा समावेशी) प्रतियोगितात्मक परीक्षाद्वारा पदपूर्ति गर्नुपर्ने भएको उल्लेख गर्दै आयोगले योग्यता पुगेका उम्मेदवारहरूबाट दरखास्त आह्वान गरेको हो।

आयोगको सूचनाअनुसार वन रक्षकमा खुलातर्फ १७, आदिवासी जनजातितर्फ ५, महिला ४, दलित, थारु, मधेशी र मुस्लिमतर्फ एक–एक जनाका लागि दरखास्त आह्वान गरिएको छ।

योग्यता पुगेका उम्मेदवारहरूले आयोगको अनलाइन दरखास्त प्रणाली psconline.p1.gov.np  मार्फत आवेदन दिनुपर्ने जनाइएको छ।

लिखित परीक्षा, शारीरिक परीक्षण तथा तन्दुरुस्ती परीक्षाको परीक्षा केन्द्र आयोगले पछि सूचना प्रकाशन गरे बमोजिम हुनेछ। प्रत्येक विज्ञापनका लागि दरखास्त दस्तुर चार सय रुपैयाँ बुझाउनुपर्नेछ।

समावेशी समूह तर्फका थप विज्ञापनमा आवेदन दिने उम्मेदवारको हकमा प्रत्येक थप समूहका लागि एक सय रुपैयाँ थप दस्तुर बुझाउनुपर्ने जनाइएको छ।

दरखास्त दिने अन्तिम मिति माघ २० गते र दोब्बर दस्तुर तिरी माघ २७ गतेसम्म रहेको छ। दरखास्त दस्तुर आयोगको अनलाइन दरखास्त प्रणाली मार्फत विद्युतीय माध्यमबाट सोझै वा मास्टर आइडी र कारोबार संकेत नम्बर उल्लेख भएको बैंक भौचर प्रिन्ट गरी तोकिएका बैंकबाट नगद समेत बुझाउन सकिने आयोगले सार्वजनिक गरेको सूचनामा उल्लेख छ।