काठमाडौं। आईसीसी विश्वकप क्रिकेट लिग टू अन्तर्गत त्रिकोणत्मक सिरिजको अन्तिम खेलमा घरेलु टोली नेपालले युएईको सामना गर्दै छ।

कीर्तिपुरस्थित टियु क्रिकेट मैदानमा हुने खेल नेपाली समयअनुसार बिहीबार बिहान साढे ९ बजेदेखि सुरु हुँदैछ।

२०१९ बाट सुरु विश्वकप लिग टू सिरिजको समेत यो अन्तिम खेल हो। नेपाल जित निकाल्दै विश्वकप छनोट खेल्ने योजनामा छ।

त्रिकोणत्मक सिरिज अन्तर्गतको पहिलो खेलमा नेपालले युएईलाई १ सय ७७ रनको कीर्तिमानी रुपमा पराजित गरेको थियो।

नेपालले लिग टू का पछिल्ला ११ खेलमा १० जित हात पारेको छ।

लिग टू अन्तर्गत नेपालले अहिले सम्म ३५ खेलबाट ३८ अंक बनाएको छ । आज खेलमा जित निकालेको खण्डमा नेपाल नामिबियालाई पछि पार्दै तेस्रो स्थानमा रहेर छनोट हुनेछ।

समान खेलबाट ३३ अंक जोडेको युएई छैटौं स्थानमा छ। लिग टू मा स्कटल्याण्ड शीर्ष स्थानमा रहदै र ओमान दोस्रो स्थानमा रहँदै विश्वकप छनोटमा पुगिसकेका छन्।

अब शीर्ष तीनमा नामिबिया र नेपालमध्ये एक हुने निश्चित भएको छ। नामिबिया अहिले ३६ खेलबाट ३९ अंकसहित तेस्रो स्थानमा छ भने अमेरिका ३६ खेलमा ३५ अंकसहित हाल पाँचौ स्थानमा छ।