काठमाडौं । आईसीसी विश्वकप क्रिकेट लिग–२ अन्तर्गत त्रिदेशीय एकदिवसीय शृङ्खलामा नेपालले पपुवा न्युगिनी (पीएनजी) लाई ५२ रनले पराजित गरेको छ ।

नेपालले दिएको २ सय ९८ रनको लक्ष्य पछ्याएको पीएनजी ४७ ओभर १ बलमा २ सय ४५ रन बनाउँदा अलआउट भयो ।

पीएनजीका लागि नोरमान भानुवाले ६०, टोनी उराले ५०, आसाद भालाले ४२ रन बनाए । बलिङतर्फ नेपालका सन्दीप लामिछाने ४, दीपेन्द्रसिंह ऐरीले २ र कुशल मल्लले १ विकेट लिए ।

यसअघि त्रिवि क्रिकेट मैदान कीर्तिपुरमा टस हारेर पहिला ब्याटिङ गरेको नेपाल ४९ ओभर १ बलमा २ सय ९७ रनमा अलआउट भयो ।

यो नेपालले एकदिवसीय अन्तर्राष्ट्रियमा बनाएको अहिलेसम्मकै उच्च स्कोर हो । नेपालका लागि आसिफ शेखले १ सय १० रन बनाए ।

एकदिवसीय अन्तर्राष्ट्रियमा उनको यो पहिलो शतक हो । यस्तै कुशल भुर्तेल ४५, भीम सार्की ४४ तथा कप्तान रोहित पौडेल ३० रन बनाए ।

बलिङतर्फ पीएनजीका सेमो कमियाले ५ र रिले हिकुरेले ३ विकेट लिए ।

यो जितसँगै नेपालले सोझै विश्व कप छनोट खेल्ने सम्भावना कायमै राखेको छ ।

नेपाललाई शीर्ष तीनमा रहँदै आउँदो जुलाईमा जिम्बाब्वेमा हुने विश्वकप छनोट सोझै खेल्न बाँकी ३ वटै खेल जित्नुपर्ने हुन्छ ।

एकदिवसीय मान्यता कायम राख्न अब १ खेल जित्नुपर्ने हुन्छ । एक खेल हारेको अवस्थामा नेपालले क्वालिफायर प्लेअफ खेल्नुपर्ने हुन्छ । यस शृङ्खलामा घरेलु टोली नेपालसहित यूएई र पीएनजी छन् । नेपालले यूएई र पपुवा न्युगिनीसँग समान २–२ खेल खेल्नेछ ।

आईसीसी विश्व कप क्रिकेट लिग–२ को यो अन्तिम शृङ्खला हो । अर्को खेल नेपालले आइतवार यूएईसँग खेल्नेछ । अङ्क तालिकामा नेपाल ३३ खेलमा ३४ अङ्कसहित पाँचौँ स्थानमा छ ।

पीएनजी ९ अङ्कसहित तालिकाको पुछारमा छ । यूएई ३२ खेलमा ३१ अङ्कसहित छैटौँ स्थानमा छ । लिग–२ का शीर्ष तीन टोलीले सोझै विश्वकप छनोट खेल्न पाउँछन् ।

स्कटल्यान्ड ५० अङ्कका साथ विजेता बन्दै र ओमान ४४ अङ्कका साथ दोस्रो स्थानमा रहँदै सोझै विश्वकप छनोटमा पुगेका छन् ।

बाँकी एक स्थानका लागि नेपालसहित नामिबिया र यूएई प्रतिस्पर्धामा छन् । यी तीन टोलीमध्ये एक टोलीले विश्वकप छनोट खेल्न पाउनेछ । नामिबिया ३६ खेलमा ३९ अङ्कसाथ तालिकाको तेस्रो स्थानमा छ ।