थपियो सोलुखोला दूधकोशीको ८६ मेगावाट बिजुली
सरल पत्रिका २४ फागुन २०७९ ११:१७
काठमाडौं । निजी क्षेत्रले निर्माण गरेको ८६ मेगावाटको सोलु खोला दूधकोशी जलविद्युत् आयोजनाले व्यावसायिक उत्पादन सुरु गरेको छ । यसअघि १५ दिन परीक्षण उत्पादन गरिएको थियो ।
साहस ऊर्जा कम्पनी लिमिटेड प्रवर्द्धक रहेको आयोजना माघ २७ देखि राष्ट्रिय प्रशारण लाइनमा जोडिएको थियो ।
सोलु दूधकोशी आयोजना स्वदेशी पुँजीमा बनेको निजी क्षेत्रको सबैभन्दा ठूलो तथा नेपालको तेस्रो ठूलो आयोजना हो ।
साहस ऊर्जाका अध्यक्ष हिम पाठकले स्वदेशी मेहनतमै ठूला आयोजना निर्माण गर्न सकिन्छ भन्ने प्रमाणित भएको बताएका छन् ।
सोलु दूधकोशी आयोजनाले राष्ट्रिय विद्युत् प्रणालीमा ३.५८ प्रतिशत योगदान पुर्याउने साहस ऊर्जाले जनाएको छ ।
०७१ असोज ६ मा विद्युत् विकास विभागबाट इजाजत पाएको सोलु खोला दूधकोशी जलविद्युत् परियोजनाले नेपाल विद्युत् प्राधिकरणसँग ०७१ फागुन १३ मा विद्युत् खरिद बिक्री सम्झौता (पीपीए) गरेको थियो ।
सोलु दूधकण्ड नगरपालिका–११ स्थित सोलु खोलाको पानी ४ हजार ६ सय ७० मिटर लामो भूमिगत सुरुङमार्ग र १९ सय ५२ मिटर लम्बाइको पाइपलाइनमार्फत थुलुङ दूधकोशी गाउँपालिका–३ मैकुबेंसीमा खसाई ८६ मेगावाट विद्युत् उत्पादन गरिएको हो ।
सोलु दूधकोशी जलविद्युत् आयोजना लाम्माने सबस्टेसनमा रहेको १३२ केभीए सोलु करिडोरमा जोडिएको छ ।
०७४ माघमा कम्पनीले सिभिल क्षेत्रको निर्माणको जिम्मा इटालियन कम्पनी सीएमसी दी रिभेन्नालाई दिएको थियो । सम्झौताअनुसार काम नगरेको भन्दै उक्त ठेक्का तोडेर नयाँ ठेक्का आह्वान गरिएको थियो ।
त्यसपछि सीई कन्स्ट्रक्सनले ठेक्का लिएर सिभिलतर्फको काम समयमै सम्पन्न गरी आयोजनाले पूर्णता पाएको कम्पनीले जनाएको छ ।
