पाँचथर । पृथ्वीनारायण शाहको नेतृत्वमा निर्माण भएको आधुनिक नेपालको जग बलियो भएकै कारण नेपाली भएर गर्वका साथ बाँच्न पाएको यहाँ आयोजित कार्यक्रम वक्ताहरुले बताएका छन् ।

सबैको भावना र अस्तित्व समेटेर सम्पन्न भएको देश निर्माणको क्रमबारे अन्यथा सोच्नु निरर्थक हुने विभिन्न राजनीतिक दल तथा संघसंस्थाका नेता तथा प्रतिनिधिहरुले बताए । ३०१ औं पृथ्वी जयन्ती तथा राष्ट्रिय एकता दिवसको अवसरमा राप्रपा पाँचथर जिल्ला कार्य समितिद्वारा आयोजित शुभकामना आदानप्रदान कार्यक्रममा बोल्दै वक्ताहरुले यस्तो विचार प्रकट गरेका हुन् ।

‘सैन्य रणनीति, कुटनीति र सहअस्तित्वबोधका धरातलमा सम्पन्न नेपाल एकीकरणले भूगोल मात्र नभएर नेपाल र नेपालीको आम भावना समेटेको छ । मन, मस्तिष्क र भावनाको एकता नभएको भए, आधुनिक नेपाल अहिलेसम्म कसरी एकजुट रहन सक्थ्यो होला,’ राप्रपाका प्रवक्ता सगुनसुन्दर लावतीले भने ।

हालसम्मकै सबैभन्दा बृहद सामाजिक, राजनीतिक परिवर्तन र रुपान्तरण पृथ्वीनारायण शाहको नेतृत्वमा प्राप्त भएको भन्दै राप्रपाका नेता लावतीले भने, ‘शान्ति, समृद्धि र समावेशीकरणको नारा र लक्ष्य लिएका पछिल्ला परिवर्तनहरुले बरु सबै नेपालीको भावना र आकांक्षा एकीकृत गर्न, सम्बोधन गर्न सफल भएन ।’

कार्यक्रमलाई सम्बोधन गर्दै लावतीले नेपाली एकीकरणकै क्रममा लिम्बुवानका शासक र गोर्खा राज्यबीच सहअस्तित्वको आधारमा किपटलगायत अन्य अधिकारका सम्मान गर्दै सन्धि संझौता भएको स्मरण गरे ।

राप्रपाका केन्द्रीय सदस्य मानदेव केरुङले पृथ्वी जयन्तीको दिन बिदा दिने राज्यको निर्णयलाई स्वागत गर्दै बडामहाराजाधिराज पृथ्वीनारायण शाहका दिव्योपदेश अर्थात् परराष्ट्र नीति, राज्य संचालनका विधि र भ्रष्टाचार विरुद्धका नीति आज पनि उत्तिकै सान्दर्भिक रहेको बताए ।

राप्रपाका केन्द्रीय सल्लाहकार सदस्य राजकुमार जोशीले विदेशी हस्तक्षेप बढीरहेको वर्तमान अवस्थामा नेपाल निर्माता पृथ्वीनारायण शाहका ‘नेपाल दुई ढुंगा बीचको तरुल हो’ भन्ने दिव्य विचार अनुकूल असंलग्न परराष्ट्र नीति व्यवहारमा अक्षरक्षः पालना गर्नु पर्ने बताए ।

नेपाली कांग्रेसका जिल्ला सचिव दिपक नेपाल, नेकपा माओवादी केन्द्रका जिल्ला नेता लालबहादुर गुरुङ, नेकपा एकीकृत समाजवादीका जिल्ला सचिव प्रेम रिजाल, नेकपा मालेका केन्द्रीय सल्लाहकार लय बाँस्कोटा, संघीय लोकतान्त्रिक राष्ट्रिय मञ्चका जिल्ला अध्यक्ष चन्द्र आङदेङवे, प्रमुख जिल्ला अधिकारी गणेश गैरे तथा उद्योग वाणिज्य संघका अध्यक्ष नवराज घिमिरेले पृथ्वी जयन्तीको महत्वबारे प्रकाश पार्दै खुला हृदयका साथ राष्ट्रिय एकता दिवस मनाउनु पर्ने धारणा राखे ।

कार्यक्रमका अध्यक्ष, राप्रपा पाँचथर जिल्ला कार्य समितिका अध्यक्ष कमल बहादुर चेम्जोङले आगामी दिनमा राष्ट्रिय एकतालाई केन्द्रमा राखेर जिल्ला जिल्लामा सरकारको तहबाट पृथ्वी जयन्तीलाई राष्ट्रिय पर्वको रुपमा मनाउने क्रम आरम्भ हुनेछ भनेर सुभेच्छा व्यक्त गरे ।

शुभकामना आदानप्रदान कार्यक्रममा नेपाल प्रहरी र सशस्त्र प्रहरी बलका जिल्ला प्रमुखहरु र नेपाल पत्रकार महासंघका प्रतिनिधिहरुको समेत उपस्थिति थियो ।