काठमाडौँ । राष्ट्रिय स्वतन्त्र पार्टी (रास्वपा) ले विवेकशील साझा पार्टीबाट एकता प्रक्रियामार्फत आएका सात जना प्रभावशाली नेताहरूलाई केन्द्रीय समितिमा मनोनयन गरेको छ। आइतबार काठमाडौँको वनस्थलीस्थित केन्द्रीय कार्यालयमा बसेको रास्वपा केन्द्रीय समितिको बैठकले उनीहरूको मनोनयनलाई विधिवत् रूपमा अनुमोदन गरेको हो।

रास्वपाको केन्द्रीय सदस्यमा मनोनयन हुनेहरूमा विवेकशील साझाकी निवर्तमान अध्यक्ष समीक्षा बास्कोटा, उपाध्यक्ष प्रकाशचन्द्र परियार र महासचिव रञ्जु दर्शना रहेका छन्। त्यस्तै, सुरज प्रधान, नवराज थापा, आशुतोष प्रधान र धनेज थापालाई पनि केन्द्रीय सदस्यको जिम्मेवारी दिइएको छ। यो निर्णयसँगै विवेकशील साझाका मुख्य अनुहारहरू अब औपचारिक रूपमा रास्वपाको नेतृत्व तहमा सामेल भएका छन्।

वैकल्पिक राजनीतिको अभ्यास गरिरहेका दुई शक्तिबीचको एकतालाई पूर्णता दिने क्रममा यो मनोनयन गरिएको रास्वपाले जनाएको छ। रास्वपा र विवेकशील साझाबीच केही समयअघि मात्रै औपचारिक एकता भएको थियो। नयाँ शक्तिहरूबीचको यो एकताले आगामी निर्वाचन र वैकल्पिक राजनीतिको भविष्यमा महत्वपूर्ण प्रभाव पार्ने अपेक्षा गरिएको छ।