काठमाडौं। सरकारले दर्ता नभएका सामाजिक सञ्जालहरू बन्द गर्ने निर्णय गरेपछि नेपाल पत्रकार महासंघले यसप्रति असहमति जनाएको छ। महासंघले एक प्रेस विज्ञप्ति जारी गर्दै सरकारको यो कदमले प्रेस तथा अभिव्यक्ति स्वतन्त्रता र नागरिकको सूचनाको हकलाई प्रभावित पार्ने बताएको छ।

महासंघका महासचिव रामप्रसाद दाहालद्वारा जारी विज्ञप्तिमा भनिएको छ, “हामी सामाजिक सञ्जालको नियमनको पक्षमा छौँ, तर प्रेस स्वतन्त्रता र अभिव्यक्ति स्वतन्त्रतालाई असर पार्ने कुनै पनि कदम हामीलाई स्वीकार्य छैन।”

महासंघले सरकारलाई तत्काल नियन्त्रण हटाउन र यस विषयमा सम्बन्धित पक्षसँग छलफल गर्न जोडदार माग गरेको छ। महासंघको भनाइअनुसार, सामाजिक सञ्जाल बन्द गर्दा नागरिकहरू सूचनाबाट वञ्चित हुनेछन्, जुन लोकतान्त्रिक समाजका लागि राम्रो होइन।