विराटनगर। नेकपा (एमाले) मोरङको १०औं जिल्ला अधिवेशनबाट संस्थापनइतर पक्षको प्यानलै निर्वाचित भएको छ। अध्यक्षमा अजम्बर राई, उपाध्यक्षमा सागर थापा, सचिवमा सोमराज थापा, सहसचिवमा सन्तोष वान्तवा र महिला सहसचिवमा उषा झा विजयी भएका छन्।

पार्टीको संस्थापन पक्षबाट अध्यक्षमा राजकुमार ओझा, उपाध्यक्षमा शान्ति लिम्बू भुजेल, सचिवमा रविन थापा, सहसचिवमा इर्जालाल राजवंशी र महिला सहसचिवमा शिल्पा निराला कार्की चुनावी मैदानमा थिए। उनीहरु इतर पक्षसँग पराजित भएका छन्।

अध्यक्षमा राईले प्रतिस्पर्धी संस्थापन पक्षका ओझालाई ३९ मतान्तरले हराए। राईले ४ सय ४६ मत पाए भने ओझाले ४ सय ७ मत प्राप्त गरे। उपाध्यक्षमा सागर थापा ४ सय २२ मत ल्याएर निर्वाचित भए। उनका प्रतिस्पर्धी शान्ति लिम्बू भुजेलले ३ सय ९१ मत मात्रै पाइन्। सचिवमा सोमराज थापाले ४ सय ६१ मत ल्याए भने प्रतिस्पर्धी रविन थापाले ३ सय ६८ मत प्राप्त गरे।

उपसचिवमा सन्तोष वान्तवाले ४ सय ९० मत ल्याए भने प्रतिस्पर्धी इर्जालाल राजवंशीले ३ सय ११ मत ल्याए। महिला उपसचिवमा उषा झा निर्वाचित भइन्। उनले ४ सय १८ मत ल्याइन् भने प्रतिस्पर्धी शिल्पा निराला कार्कीले ४ सय ५ मत पाइन्।

अधिवेशन फागुन १७ गतेदेखि विराटनगरमा सुरु भएको थियो। नेतत्व चयनका लागि भएको मतदानमा ८ सय ८८ मत खसेको थियो । ९ सय ११ जना प्रतिनिधिमध्ये २३ जना अनुपस्थित भएका थिए।