काठमाडौँ। विभिन्न अस्पताल तथा स्वास्थ्य संस्थाले स्वास्थ्य बीमा अन्तर्गतका सेवामा ढिलासुस्ती गर्नुका साथै बिरामीलाई आवश्यक सुविधा दिन आनाकानी गरेको गुनासो बढेपछि स्वास्थ्य बीमा बोर्डले कडाइ गर्ने संकेत दिएको छ ।

बोर्डका अनुसार केही सेवा प्रदायक संस्थाले बीमित सेवाग्राहीलाई सहज रूपमा सेवा नदिएको, अनावश्यक झन्झट दिएको तथा उपचार प्रक्रियामा अवरोध सिर्जना गरेको पाइएको छ ।

यस्तो प्रवृत्ति रोक्न र बीमितप्रति जिम्मेवार बन्न बोर्डले सबै स्वास्थ्य संस्थालाई आग्रह गरेको छ ।

बीमा सेवा लिन अग्रिम समय लिनुपर्ने बाध्यता, बीमितप्रति गरिने विभेदपूर्ण व्यवहार तथा आवश्यक औषधि र सेवामा देखिएको कमीप्रति बोर्डले गम्भीर ध्यानाकर्षण भएको जनाएको छ ।

स्वास्थ्य बीमा ऐन, २०७४ र स्वास्थ्य बीमा नियमावली, २०७५ विपरीत कुनै पनि गतिविधि नगर्न बोर्डले सचेत गराउँदै अब अनुगमन प्रक्रियालाई थप प्रभावकारी बनाउने तयारी गरेको छ ।

अनुगमनका क्रममा कुनै पनि स्वास्थ्य संस्थाले नियम उल्लङ्घन गरेको पुष्टि भएमा कानुनअनुसार कडा कारबाही गरिने बोर्डले स्पष्ट पारेको छ ।