काठमाडौँ। कोलम्बियाको दक्षिणी क्षेत्रमा सैनिक जवानहरू बोकेको एउटा सैन्य विमान उडान भर्ने क्रममा दुर्घटनाग्रस्त भएको छ। आइतबार भएको दुखद दुर्घटनामा ठूलो सङ्ख्यामा मानवीय क्षति भएको र धेरै व्यक्तिहरू घाइते भएको अन्तर्राष्ट्रिय सञ्चारमाध्यमहरूले जनाएका छन्।

कोलम्बियाका रक्षामन्त्री पेड्रो ए सान्चेजका अनुसार ‘हर्कुलस’ नामको उक्त सैन्य विमान पुएर्टो लेगुइजामोबाट उडान भर्ने क्रममा दुर्घटनामा परेको हो। विमानले सैनिक जवानहरू ओसारपसार गरिरहेको थियो। रक्षामन्त्रीले घटनाप्रति गहिरो दुःख व्यक्त गर्दै सैन्य टोलीहरू घटनास्थलमा पुगिसकेको जानकारी दिए।

दुर्घटनामा परेकाहरूको यकिन सङ्ख्याबारे फरक-फरक विवरणहरू बाहिर आएका छन्। कोलम्बियाली एयरोस्पेस फोर्सले सामाजिक सञ्जाल एक्समार्फत ६ जना चालक दलका सदस्यहरूको मृत्यु भएको पुष्टि गरेको छ।

यद्यपि समाचार संस्था रोयटर्सले सैन्य स्रोतलाई उद्धृत गर्दै सोमबार साँझसम्म मृतकको सङ्ख्या ६६ पुगेको जनाएको छ। कोलम्बियाको ठूलो पत्रिका एल टिएम्पोले विमानमा कम्तीमा १२० जना सवार रहेको उल्लेख गरेको छ।

अहिले घटनास्थलमा तीव्र रूपमा उद्धार कार्य भइरहेको छ। घाइतेहरूलाई उपचारका लागि सैन्य अस्पताल लगिएको छ। घटनाको यकिन कारण अझै खुल्न सकेको छैन र अनुसन्धान जारी रहेको बताइएको छ।

गत फेब्रुअरीमा पनि बोलिभियाली वायुसेनाको हर्कुलस विमान दुर्घटना हुँदा दर्जनौँको मृत्यु भएको थियो। कोलम्बियाको यो घटनालाई सोही प्रकृतिको अर्को ठूलो सैन्य विमान दुर्घटनाका रूपमा हेरिएको छ। घटनाको विस्तृत विवरण आउन अझै बाँकी छ।