काठमाडौँ। चर्चित लोकरक ब्यान्ड नेपथ्यले यस वर्षको फेब्रुअरी महिनालाई संगीतको महिना बनाउने भएको छ। दुई चरणमा हुने स्वदेश यात्राको पहिलो चरण अन्तर्गत फेब्रुअरी ४ (माघ २१) देखि नेपथ्यले देशका चार सहरमा कन्सर्ट गर्ने घोषणा गरेको छ।

कन्सर्टको तालिका: हेटौंडादेखि बन्दीपुरसम्म

माघ २१ (हेटौंडा): यात्राको सुरुवात हेटौंडाको भुटनदेवी माध्यमिक विद्यालयको प्राङ्गणबाट हुनेछ। तीन वर्षअघि पनि नेपथ्यले यहीँ आफ्नो प्रस्तुति दिएको थियो।

माघ २४ (बुटवल): ‘रोज डे’ को अवसर पारेर बुटवल इन्टरनेशनल कन्भेन्सन सेन्टरमा कन्सर्ट आयोजना हुनेछ। शनिबार परेकाले यसलाई प्रेमिल मिलनको केन्द्र बनाउने आयोजकको तयारी छ।

माघ २७ (नारायणघाट): चितवनको प्रसिद्ध क्याम्पा चौरमा नेपथ्यका दर्शकले संगीतमय साँझको अनुभव गर्नेछन्।

फागुन २ (बन्दीपुर): विश्वभर भ्यालेन्टाइन डे मनाइरहँदा नेपथ्य पहिलोपटक पहाडी नगरी बन्दीपुरको टुँडिखेलमा गुञ्जिनेछ।

ब्यान्डका मुख्य गायक अमृत गुरुङले परिचित सहरहरूसँगै नयाँ गन्तव्य बन्दीपुरमा गायकको रूपमा पुग्न पाउँदा आफू उत्साहित रहेको बताए। बन्दीपुरमा बसेकै बेला आफूले लेखेका गीतहरू समेत ब्यान्डले प्रस्तुत गर्ने उनले जानकारी दिए।

कन्सर्टलाई व्यवस्थित बनाउन हेटौंडा, बुटवल, नारायणघाट र बन्दीपुरमा स्थानीय आयोजकहरू खटिएका छन्। बुटवल, नारायणघाट र बन्दीपुरका लागि छुट्याइएका ‘अर्ली बर्ड’ टिकटहरू सकिइसकेका छन् भने विद्यार्थीहरूका लागि विशेष सहुलियत टिकटको व्यवस्था गरिएको छ।

नेपालयका किरणकृष्ण श्रेष्ठका अनुसार, कन्सर्टको गुणस्तरलाई विश्वस्तरको बनाउन अत्याधुनिक प्रविधि र व्यवस्थापनको प्रयोग गरिनेछ। दर्शकहरूले नेपथ्यको आधिकारिक वेबसाइटबाट सिधै अनलाइन टिकट बुक गर्न सक्नेछन्।

यो यात्राको दोस्रो खण्ड भने आगामी नोभेम्बर महिनामा आयोजना हुनेछ। कन्सर्टमा अमृत गुरुङलाई ध्रुव लामा, सुबिन शाक्य, निरज गुरुङ, शान्ति रायमाझी र दिनेशराज रेग्मीले सघाउनेछन्।