घर, कार्यालय होस् या विद्यालय, समय हेर्नका लागि भित्तामा घडी झुन्ड्याउनु सामान्य कुरा हो। धेरैले यसलाई घर सजावटको वस्तु मात्र ठान्छन् र खाली भएको कुनै पनि भित्तामा घडी राख्ने गर्छन्। तर, वास्तुशास्त्रका अनुसार घडीको दिशा र अवस्थाले हाम्रो जीवनमा सकारात्मक वा नकारात्मक प्रभाव पार्न सक्छ।

वास्तुशास्त्र भन्छ- गलत दिशामा राखिएको घडीले घरको सकारात्मक ऊर्जा कम गर्छ र अशान्ति निम्त्याउन सक्छ। त्यसैले घरमा घडी राख्दा केही वास्तु नियमहरूको पालना गर्नु जरुरी छ।

घडी राख्ने सही दिशा र तरिका

शुभ दिशा: वास्तुअनुसार घडी लगाउनका लागि उत्तर वा पूर्व दिशा सबैभन्दा उत्तम मानिन्छ। उत्तर दिशा धनका देवता कुबेरको दिशा भएकाले यहाँ घडी राख्दा घरमा सुख-समृद्धि आउँछ। यस्तै, पूर्व दिशाबाट सकारात्मक ऊर्जाको सञ्चार हुने भएकाले यो दिशा पनि शुभ मानिन्छ।

रङ्गको छनोट: घरमा शुभ रङ्गका घडीहरू प्रयोग गर्नुपर्छ। विशेषगरी कालो रङ्गको घडी घरमा लगाउनुलाई वास्तुमा अशुभ मानिएको छ।

सरसफाइ: भित्ताको घडी सधैँ सफा हुनुपर्छ। घडीमा धूलो जम्न दिनु हुँदैन, किनकि फोहोर घडीले नकारात्मक ऊर्जालाई आकर्षित गर्छ।

घडीसँग जोडिएका विशेष सावधानीहरू

दक्षिण दिशामा कहिल्यै नराख्नुहोस्: वास्तुशास्त्रमा दक्षिण दिशालाई स्थिर वा यमराजको दिशा मानिन्छ। त्यसैले यस दिशामा घडी झुन्ड्याउनुलाई निकै अशुभ मानिन्छ। यसले घरका सदस्यहरूको प्रगतिमा बाधा पुर्‍याउन सक्छ।

बिग्रिएको घडी नराख्नुहोस्: घरमा कहिल्यै पनि बिग्रिएको, फुटेको वा रोकिएको घडी राख्नु हुँदैन। रोकिएको घडीले समय मात्र होइन, घरको उन्नति र विकास पनि रोकिएको सङ्केत गर्छ। यदि घडी बन्द छ भने तुरुन्तै ब्याट्री फेर्ने वा मर्मत गर्ने गर्नुपर्छ।

ढोका माथि घडी नराख्नुहोस्: प्रायः मानिसहरू ढोकाको ठीक माथि घडी झुन्ड्याउँछन्, तर वास्तुअनुसार ढोका माथि घडी राख्दा त्यसमुनिबाट हिँड्ने व्यक्तिको स्वास्थ्य र मानसिक अवस्थामा नकारात्मक प्रभाव पर्न सक्छ।

वास्तुशास्त्री राजीव शर्मा भन्छन्, ‘समय बलवान् हुन्छ, र वास्तुअनुसार मिलाइएको घडीले तपाईंको समयलाई अझ सुखद बनाउन मद्दत पुर्‍याउँछ।’