'ओलीको शासन पनि देखियो, माओवादी त सकिई नै हाल्यो' - प्रकाश कोइराला

शहरभन्दा अलि पर कोलाहलले त्यति असर नपारिसकेको शान्त वातावरणमा बस्छन् प्रकाश कोइराला । दर्जनौं बृक्ष र बुट्यानले सजिसजाउ कुनै ध्यान केन्द्र झैं आभास हुने उनको निवासमा पसेपछि शहरको ध्वनि र धुलोको आक्रमणबाट अलिकति राहत मिलेको महसुस हुन्छ । उनी सपरिवार त्यहीं बस्छन् । साथीभाई शुभचिन्तक,संचारकर्मी वा पिता वीपीका राजनीतिक शिष्य जो आएपनि प्रकाश सहज उपलव्ध छन् । सबैलाई सुन्छन् अनि आफ्ना बिचारहरु पनि सुनाउँछन् । तर उनी एउटा धारणामा भने सदा दृढ छन् –‘वीपीको राजनीतिक मार्गचित्र नै नेपालको सही मार्गचित्र हो,यसलाई उलंघन गरेर नेपाली कांग्रेसले ठूलो गल्ती गरेको छ । अहिले त्यसकै परिणाम भोगिरहेको छ कांग्रेस ।’ प्रकाश कोइरालाको नाम चिनाउन न कुनै विशेषणको जरुरत पर्छ न त पूर्व र भूतपूर्व पदहरुसँगै जोडेर उनको चिनारी गराउनु आवश्यक छ ।  चलनचल्तीको भाषामा भन्दा ‘ब्राण्डेड’ नाम छ उनको ।

 केही समय मुम्बई बसेर हालै फर्किएका कोइरालाले भलाकुसारी सुरु गर्दै भने, हेर्नोस् ‘यहाँ एउटा मुलुक हाँक्ने दलको खाँचो छ ।’ उनले  सत्ता र प्रमुख प्रतिपक्षमा रहेका राजनीतिक दलहरु नेकपा र नेपाली कांग्रेसको साख खस्कँदै गएकोमा खिन्नता प्रकट गरे । कोइरालाले भने,‘अहिलेका दलहरुसँग कोही पनि सन्तुष्ट देखिँदैनन् ।’

पिता वीपी कोइरालाको राजनीतिक लाईन नै नेपालको लागि सर्वोत्तम लाईन रहेको आफ्नो पूर्व धारणामा अडिग छन् प्रकाश कोइराला । जति पनि आन्दोलन र हिंसात्मक संघर्ष भए तर तिनले जनतालाई सन्तुष्टि दिन नसकेको उनको निष्कर्ष छ । भन्छन्,‘पैसा कमाउने मामिलामा सबै (दल र नेता) मिलेका छन् । तर देश र जनताको हितमा काम गर्नमा सबै चुकिरहेका देखिन्छन् ।’

  ओलीको साख

दुइतिहाई बहुमतको वर्तमान सरकारले पनि जनता र अन्तर्राष्ट्रिय समुदायको विश्वसनियता आर्जन गर्न नसकेको कोइरालाको भनाई छ । भन्छन्,‘ओलीजीले पनि दुइतिहाईको सरकार चलाएको देखियो,तर दिनदिनै उहाँको समेत साख गिर्दो अवस्थामा देखिन्छ । सरकारको कुनै चर्चा गर्न लायकको छवि नै बनेको छैन । माओवादीको त कुरै नगर्दा हुन्छ, उ त छँदा पनि छैन अब माओवादी सकिईसक्यो ।’  

प्रधानमन्त्री केपीशर्मा ओली तीनवटा चर्चित घटनामा प्रभावहीन र असफल देखिएको कोइरालाको टिप्पणी छ । ‘निर्मला पन्त बलात्कार र हत्या काण्ड,३८ किलो सुन तश्करी काण्ड र वायु सेवा निगमको वाईडबडी जहाज खरिद काण्ड । यी तीनवटा चर्चित काण्डमा ओलीजीले खै के   गर्नुभयो ? यति शक्तिशाली सरकारका प्रधानमन्त्री कहाँ हराउनुभयो !’ कोइरालाले आश्चर्य प्रकट गर्दै भने–‘देशको अर्थव्यवस्था ‘कोल्याप्स’हुने अवस्थामा छ,नेपाल राष्ट्र बैंकको तथ्यांकले नै यसबारेमा प्रष्ट खुलासा गरिरहेको छ । खै दुइतिहाईको बलियो सरकार अनि कहाँ हरायो प्रमुख प्रतिपक्ष ?’  

सरकार–सीके प्रसंग 

हालै सरकारले सीके राउतसँग गरेको सहमतिबारे कोइराला आफू पर्याप्त अपडेट भइनसकेको बताउँछन् । तर उनले मधेशवादी दलले तराई मधेशका जनताको नेतृत्व गर्न नसकेको टिप्पणी गरे । राउतलाई अचानक अदालतबाट सफाई मिल्नु र रातारात सरकारसँग ‘विवादास्पद’ सहमति हुनु सामान्य घटना नभएको कोइरालाको तर्क छ । 

कोइरालाले गम्भीर मुद्रामा भने,‘अदालतले कसरी छोड्यो,उनी कसरी छुटे,सहमति नै भयो कसरी,सत्तारुढ दलकै नेता भीम रावल विरोध गरिरहेका छन् । म यी सबै कुराहरु कसरी भए भनेर हेरिरहेको छु । तर यसै हो भनेर भन्न सकिरहेको छैन ।’ 

दलहरुको साख खस्किएको टिप्पणी गरिरहँदा कोइरालाले आफ्ना पिताले स्थापना गरेको नेपाली कांग्रेस प्रतिपक्षको भूमिकामा प्रभावकारी नदेखिएको टिप्पणी गरे ।

 ‘खै कहाँ गयो कांग्रेस,उसको हालत त निर्वाचनमै देखिएको हो,अहिले आएर त संसदमा समेत प्रमुख प्रतिक्षको भूमिकामा कुनै हैसियत नै देखाउन सकेको छैन’,कोइरालाले असन्तुष्टि पोख्दै भने ।

धार्मिक भेलाको आकर्षण

यता दलहरुको साख र विश्वसनियता खस्किँदै गएको छ भने अर्कोतिर देशका विभिन्न भागमा ठूल्ठूला धार्मिक भेला र सभाहरु पनि आयोजना भैरहेका छन् । यसतर्फ हेर्दा सर्वसाधारण जनताले आफ्नो सांंस्कृतिक मूल्यमान्यताप्रति लगाव प्रष्ट रुपमा प्रदर्शन गरिरहेका र यथास्थितिप्रति पनि असन्तोष प्रकट गरिरहेको देखिएको कोइरालाको विश्लेषण रहेको छ । उनले हालै धरान र बीरगंजमा सम्पन्न भएका ठूला धार्मिक कार्यक्रमहरुको उदाहरण दिँदै त्यहाँको सहभागिताले नेपाल परम्परागत रुपमै वैदिक सनातन र हिन्दूत्वप्रति गहिरो सम्बन्ध भएको देशमा अझै त्यो भावना कमजोर नरहेको प्रष्ट देखिएको चर्चा गरे ।

धर्म निरपेक्ष मुलुक भारतमा नरेन्द्र मोदी सत्तामा आएपछि उनले हिन्दूत्वको पकड बढाउँदै लगेको कोइरालाको ठम्याईं छ । उनले भने–‘मलाई के लाग्छ भने भारत चाहन्छ कि नेपालको धर्मनिरपेक्षता हटोस् ।’
 

बढ्दो भारतीय प्रभाव 

वीपीको राजनीतिक दर्शन र लाईन नै नेपालका लागि उपयुक्त रहने भनाई दोहोर्याउँदै कोइरालाले नेपालमाथिको भारतीय प्रभाव कम गर्न विगतका तीनजना राजाले प्रयास गरेको चर्चा गरे । उनले भने–‘वीपी यसमा राजासँग हुनुहुन्थ्यो ।’ 

तर अहिलेका दलहरु र नेताले त्यो प्रभाव झन्झन् बढाउन सहयोग गरिरहेको देखिएको चर्चा गर्दै कोइरालाले नेपालमाथि अरु कसैको अनावश्यक प्रभाव रोक्ने कुरामा वीपी बाहेक अर्को राजनीतिक नेतृत्व नदेखिएको बताए ।

अमेरिकी पछुतो

कोइरालाले दलहरुप्रति कटाक्ष गर्दै ‘ठूलो क्रान्ति गर्दै राजा हटाएर गणतन्त्र ल्याए तर सबै दलका नेताको ‘पर्फरमेन्स’ देखेर विदेशीहरु पनि पछुताईरहेका होलान्’ भने । कोइरालाले अझ यसमा जोड दिएर भने–‘दलहरुको पर्फरमेन्स देखेर अमेरिकीहरु त बेकारमा राजा हटाईयो भनेर पछुताईरहेका होलान् !’
 

त्रशित प्रचण्ड

सत्तारुढ दलका अध्यक्ष पुष्पकमल दाहाल ‘प्रचण्ड’को चर्चित वक्तव्यबारेमा पनि कोइरालाले आफ्नो धारणा राख्न छुटाएनन् । उनले नेपालसँग कुनै औपचारिक सम्बन्ध नै नरहेको देशको आन्तरिक राजनीतिबारे प्रचण्डको भेनेजुएला प्रसंगको वक्तव्यलाई ‘चानचुने होइन निकै गम्भीर कुरा हो’   भने । कोइरालाले भने –‘प्रचण्डले उनको निजी रिस पोखेका हुन्,उनलाई परराष्ट्र नीति नै थाहा रहेनछ कि कसो ! अमेरिकाले द्वन्दको मुद्दा उठाउन लागेको ठानेर तर्सिएर त्यस्तो वक्तव्य दिएका हुनसक्छन् ।’ तस्बिर सौजन्यः चन्द्रशेखर कार्की (sadrishya.com)
   


  
 

‘सकरात्मक प्रेम चाहनेले जानी नजानी हेनैपर्छ’

 मोदनाथ खनाललाई चलचित्र निर्माताका रुपमा सक्रिय देख्दा धेरैलाई अनौठो लाग्न पनि सक्छ । दर्शन,अध्यात्म र पत्रकारितामा जमेका खनाल एक शुक्ष्म विश्लेषक

\"शेरबहादुरजीले आफू पनि बाँधिन्छु भन्ने कुरा बुझ्नुभएन\": शेखर कोइराला

डाक्टर साब, कांग्रेसको स्वास्थ्य कस्तो छ ? बिरामी अवस्थामा देख्छु । कताकता मलाई लाग्छ, संविधान बनाउँदा नै हामी पछाडि पर्‍यौँ । हाम्रो नेतृत्वमा

 ‘सामान्य ज्ञान नभएका व्यक्तिलाई निगम जिम्मा लाउनु नै ठूलो भूल’

अहिले पछिल्लो समय नेपाल वायुसेवा निगम (नेवानि) ले खरिद गरेको एयरबस ए ३३० वाइडबडी जहाजबारे खबरहरु आइरहेको छ । नेवानिले जहाज ल्याउनु अनिवार्य नै थियो

 ‘निर्मला पन्तका हत्यारा पत्ता लाउनु पानी तताएजस्तो काम होईन’–बिष्णु रिमाल, प्रधानमन्त्रीका प्रमुख सल्लाहकार

काठमाडौं । प्रधानमन्त्री केपी शर्मा ओलीका प्रमुख राजनीतिक सल्लाहकार बिष्णु रिमालले बलात्कारपछि हत्या गरिएकी निर्मला पन्तका हत्यारा पत्ता लाउनु